Vildarklúbbur Móra

Gildir frá 10. september 2026.

1. Um klúbbinn

Félagar í Vildarklúbbi Móra safna inneign sem hlutfalli af kaupum sínum. Inneignin er skráð á viðskiptavinareikning hjá Móra og nýtist sem greiðsla, bæði í vefverslun og í verslunum okkar.

Rekstraraðili klúbbsins er Lundhaven ehf., kt. 531120-0510.

2. Aðild

Aðild er ætluð einstaklingum 18 ára og eldri sem eru með viðskiptavinareikning hjá Móra og hafa samþykkt að fá markaðspóst frá okkur. Samþykkið er aðildin — það er engin sérstök umsókn og ekkert kort.

Þú getur skráð þig í klúbbinn á vörusíðu, við frágang pöntunar, eða með því að skrá þig á póstlistann okkar.

Þú getur sagt þig úr klúbbnum hvenær sem er, með afskráningarhlekknum í hvaða pósti sem er frá okkur eða með því að hafa samband við verslun@mori.is. Uppsögn stöðvar frekari söfnun en hefur engin áhrif á inneign sem þú hefur þegar unnið þér inn — hún heldur gildi sínu til fyrningardags síns.

3. Söfnun

Inneign sem myndast við vörukaup er ákvörðuð af Móra hverju sinni, og getur breyst án fyrirvara.

Til að inneign reiknist þarftu að vera skráður á pöntunina þegar kaupin fara fram. Gangir þú í vildarklúbbinn innan 14 daga frá kaupum reiknast inneign einnig af þeirri pöntun.

4. Vörur sem safna ekki inneign

Gjafakort og sendingarkostnaður safna ekki inneign. Sé vöru skipt fyrir aðra vöru reiknast aðeins inneign af mismuni vörukaupa sem er til greiðslu.

5. Greiðsla með inneign

Sé greitt að fullu með inneign safnast engin ný inneign af þeim kaupum. Sé greitt að hluta með inneign safnast inneign af þeim hluta kaupverðsins sem greiddur er með öðrum greiðslumáta en inneign.

6. Hvenær inneignin verður nothæf

Inneign verður nothæf 14 dögum eftir kaup í vefverslun vegna 14 daga skilaréttar í fjarsölu skv. lögum nr. 16/2016, og einum degi eftir kaup í verslun.

Þú færð tölvupóst þegar inneignin er orðin nothæf.

7. Gildistími

Inneign gildir í 90 daga frá því hún verður nothæf, til og með fyrningardegi. Fyrningardagurinn sést á viðskiptavinareikningnum þínum á www.mori.is.

Við sendum þér áminningu í tölvupósti áður en inneign rennur út. Ónotuð inneign fellur niður að fyrningardegi loknum.

8. Skil og endurgreiðslur

Sé vöru skilað fellur niður sú inneign sem safnaðist af henni, hlutfallslega miðað við það sem endurgreitt er. Þetta gildir hvenær sem skilin fara fram, einnig löngu eftir að inneignin varð nothæf — til dæmis þegar galli kemur í ljós.

Hafir þú þegar nýtt inneignina og staðan dugar ekki fyrir bakfærslunni fellur mismunurinn á Móra. Hann er hvorki dreginn frá endurgreiðslunni né skuldfærður af inneign sem þú vinnur þér inn síðar.

Bakfærsla snertir aldrei inneign sem Móri hefur lagt inn vegna vöruskila. Aðeins inneign sem safnaðist með kaupum er dregin til baka, jafnvel þótt staða reikningsins leyfi meira.

Vara sem hefur verið endurgreidd safnar aldrei inneign, þótt gengið sé í vildarklúbbinn eftir á.

9. Eðli inneignar

Inneign er ekki framseljanleg, verður ekki leyst út í reiðufé og ber ekki vexti. Hún er bundin við þann viðskiptavinareikning sem hún safnaðist á og verður ekki flutt á milli reikninga.

10. Misnotkun

Móra er heimilt að fella niður inneign og loka aðgangi að klúbbnum sé inneignar aflað með sviksamlegum hætti.

11. Breytingar á klúbbnum

Móra er heimilt að breyta þessum skilmálum, breyta söfnunarhlutfalli og reglum, og að hætta rekstri klúbbsins fyrirvaralaust og án tilkynninga til meðlima.

12. Tæknileg vandamál og leiðréttingar

Komi upp tæknileg bilun, kerfisvilla eða önnur mistök sem valda því að inneign reiknast, skráist eða nýtist með röngum hætti er Móra heimilt að leiðrétta inneignarstöðu viðskiptavinar í samræmi við réttar upplýsingar um viðskipti hans. Þetta á bæði við þegar of mikil eða of lítil inneign hefur verið veitt eða dregin frá.

Viðskiptavinur verður upplýstur ef gerð er veruleg leiðrétting á inneignarstöðu hans. Sé inneign lækkuð skal Móra, eftir því sem unnt er, geta sýnt fram á ástæðu leiðréttingarinnar.

Tímabundin bilun eða óaðgengileiki klúbbsins veitir ekki rétt til bóta eða viðbótarinneignar. Réttilega áunnin inneign glatast þó ekki vegna tæknilegra vandamála og skal hún leiðrétt þegar fullnægjandi upplýsingar um viðskiptin liggja fyrir.

Viðskiptavinur skal tilkynna Móra án óþarfa tafar telji hann inneignarstöðu sína ranga og leggja fram kvittun eða aðrar upplýsingar um viðskiptin sé þess óskað.

13. Persónuupplýsingar

Um meðferð persónuupplýsinga fer eftir persónuverndarstefnu Móra. Þar er talið upp hvaða þjónustuaðilar koma að rekstri klúbbsins og hversu lengi upplýsingar eru varðveittar.

Fyrirspurnir um persónuupplýsingar má senda á verslun@mori.is.

14. Ágreiningur

Um skilmála þessa gildir íslenskur réttur. Mál sem rísa af þeim má reka fyrir Héraðsdómi Reykjavíkur.